Au Seigneur des Essars N de Herberay

Au grand desir, à l’instante requeste
De tant d’amys dont tu peux disposer,
Vouldrois tu bien (ô amy) t’opposer
Par un reffus de chose tres honeste ?

Chacun te prie et je t’en admoneste,
Que l’Amadis qu’il t’a pleu exposer
Vueilles permettre au monde et exposer,
Car par tes faitz gloire et honneur acqueste.

Estimes tu que Cesar ou Camille
Doibvent le cours de leur claire memoire
Au marbre, ou fer, à cyseau ou enclume ?

Toute statue ou medaille est fragile
Au fil des ans, mais la durable gloire
Vient de main docte et bien disante plume.